Նշով տորթ անանասի միջուկով
Անի Նալբանդյան · նոյեմբեր 25 2014Նուշի, անանասի և հատապտուղների հրաշալի համադրությամբ այս տորթը անտարբեր չի թողնի քաղցրավենիքի սիրահարներին: Պատրաստեք և զարմացրեք Ձեր հյուրերին:
- Խմորի համար`
- 4 միջին չափի ձու
- 100 գ շաքարավազ
- 40 գ ալյուր
- 100 գրամ նուշի ալյուր (աղացած նուշ)
- 1 թ/գ փխրեցուցիչ
- Հատապտուղային դոնդողի համար`
- 400 գրամ սառեցրած կարմիր հատապտուղներ (ազնվամորի, ելակ, սև հաղարջ)
- 200 գրամ շաքարավազ
- 10 գրամ ժելատին
- ջուր
- Կրեմի համար`
- 560-580 գրամ պահածոյացված անանաս
- 200 գրամ կաթնաշոռ
- 120 գրամ շաքարավազ
- 16 գրամ դոնդող
- 400 գրամ սերուցք 33 %
Դոնդողի փոշու վրա լցնել 0.5 բաժակ սառը ջուր և թողնել մինչև ուռի: Հատապտուղները հարել բլենդերով և ավելացնել շաքարավազը: Ստացված զանգվածը դնել թույլ կրակի վրա և խառնել մինչև շաքարավազը հալի: Արդեն պատրաստի Դոնդողը ավելացնել հատապտուղների մեջ: Դոնդողի սառեցնելու ամանը ընտրելիս ուշադրություն դարձրեք որ ամանի չափը հնարավորինս համապատասխանի տորթի շերտերի չափին: Կրակից վերցնել, լցնել համապատասխան ամանի մեջ և դնել սառցախցիկը:
Ձուն և շաքարավազը հարել մինչև պնդանա: Ալյուրը խառնել փխրեցուցիչի և աղացած նուշի հետ:Խառնուրդը լցնել հարած ձվերի վրա և զգուշորեն խառնել: Խմորը եփել 180 C ջերմաստիճանի տակ նախապես տաքացրած ջեռոցում 30 րոպե: Եփված խմորը թողնել սառի մի քանի ժամ, կամ ավելի լավ է ամբողջ գիշեր:
Անանասի հյութը դատարկել ուրիշ ամանի մեջ և դրանով թրջել դոնդողը: Անանասները կտրել խորանարդիկներով:Կաթնաշոռը և շաքարավազը հարել իրար հետ: Այստեղ նաև ավելացնել անանասը և պատրաստի դոնդողը: Սկզբում այն ջրիկ կլինի, բայց արդեն 15-20 րոպեից այն կսկսի խտանալ: Հետո խփել սերուցքը: Սերուցքը և անանասով կաթնաշոռը միացնել իրար:
Ժամանակն է հավաքել տորթը: Խմորը մեջտեղից բաժանել երկու մասի: Ներքևի շերտը դնել ափսեի վրա, վրան քսել կրեմի կեսը,դնել դոնդողի շերտը,դնել խմորի հաջորդ շերտը և քսել կրեմի մյուս կեսը: Տորթը դնել սառնարանում և պահել 3 ժամ: